యోగాసన గణితం

గణిత సూత్రంలా, నిత్యం సాధన చేయి,

జీవన రేఖ సమంగా, సరళంగా సాగుతుంది.

           కోణం, కొలత సరిగా పెట్టి,

           ఆసన గమనం స్థిరంగా సాగించు 

త్రికోణంలా శరీరం వంచి,

వృత్తంలా శ్వాస నింపుకో 

         సమాంతరంగా ఆలోచనలు సాగితే,

         సమస్యావృత్తం ఛేదించబడుతుంది.

సమీకరణంలా, సమతుల్యతను కలిగి, 

అవసరంలేని వ్యయం లేకుండా జీవించు

         దీర్ఘచతురస్రంలా స్థిరంగా ఉండి,

         శూన్యంలా శాంతంగా ఉండు.

భూమికి లంబంగా నిలబడి,

గ్రాఫ్ గీసినట్టుగా, ప్రతీ కదలిక,  

సమబాహు త్రిభుజంలా స్థిరంగా నిలుపుతూ...

          బిందువు నుండి రేఖ, రేఖ నుండి తలం....

          సమద్విబాహువులా శ్వాస తీసుకో,

సమాంతర రేఖల్లా మనసును నిలబెట్టుకో

భాగహార సూత్రంలా, బాధను పంచుకో,

శేషం లేకుండా సున్నాకు చేరుకో

          శరీరం ఒక కొలత బద్ద,

          ప్రతీ అంగుళం విలువైనదే.

మనసు ఒక జ్యామితి పుస్తకం,

జ్ఞానం నిత్యం పెరుగుతూనే ఉంటుంది.

ఘాతంలా శక్తిని పెంచుకో,

           మూలాల నుంచి బలంగా ఎదుగు.

           వర్గమూలంలా సమస్యను ఛేదించి,

            నిత్య జీవనానికి బలం చేకూర్చు.

పైథాగరస్ సిద్ధాంతంలా ధృడంగా,

ప్రతీ ఆసనం ఒక సూత్రమే.

           గణితంలా యోగా అనంతం,

           శాంతి, ఆరోగ్యానికి ప్రతీక.